Виберайся, Ганцю

1. Виберайся, Ганцю, виберай, виберай,
Што си заробила, то си і позберай. (2)

2. Виберайся, Ганцю, виберайся з нами,
Вшитки свої злости прилож каменями. (2)

3. Я їх приложила, они ся двигают,
Який то жаль велький, як ся виберают. (2)

4. Не плач, Ганцю, не плач, най ти плаче мати,
Же юж ї не будеш хижу замітати. (2)

5. Не старайся, Ганцю, же не знаш хліб печи,
Напече ти Ванцьо дос помеджи плечи. (2)

6. Будеш ти, Ганичко, горенько плакати,
Як тя буде свекра з хижі виганяти. (2)

7. Одріже ти хліба, як буковий листик,
Ищи тя ся звідат, ци ж го з'їла вшиток. (2)

8. Не з'їла, не з'їла! Де лес го поділа?
В сіньох за дверями, змочений слезами.

Поділитись сторінкою: